05.06.2011 14:48

Brimfaxamótið 2011



Brimfaxamótið tókst bara bærilega vel og veðrið alveg þolanlegt. Það hefði verið gaman að sjá fleirri krakka og konur, en það verður ekki á allt kosið, það var bara svo mikið í gangi á sama tíma t.d. kvennahlaup krakkamót í fótbolta og fl. og fl. Grillaðar voru pylsur fyrir gesti og gangandi og skapaði það skemmtilega fjölskyldustemmningu fyrir vikið. Einhamar gaf öll verðlaunin og pylsurnar. Stafholtshestar gáfu drykkjarföng og kol. H.K. Verk gaf pylsubrauðin og félagið skaffaði tómat sinnep og lauk, þannig að kostnaður fyrir félagið var óverulegur. Stjórn Brimfaxa vill þakka öllum þeim sem styrktu okkur og þeim sem lögðu hönd á plóginn. Jón Ásgeir sá að mestu um undirbúning móptsinns ásamt fleirrum.

Hlyni dómara þökkum við fyrir ásamt aðstoðarmanni. Hlynur minn þetta var létt í vasa en vonandi hafðir þú gaman af þessu eins og við.

Nokkrir krakkar voru í teymingaflokknum og fengu þau öll verðlaun eftir nokkra hringi í teymingu

Kvennaflokkurinn var heldur rýr enda kvenfólkið í kvennahlaupi á sama tíma. Þær sem hlupu ekki en völldu í staðin að láta hlaupa með sig voru aðeins fjórar. Þrátt fyrir að vera fáar þá voru þetta glæsilegir fulltrúar á flottum hrossum. Stella og Valíant urðu í efsta sæti enda Valíant glæsilegur hestur og Stella lunkin knapi. Til hamingju Stella.

Í karlaflokki kepptu þrettán einstaklingar og er skemmst frá því að segja að Stebbi Kristjáns rúllaði þessu upp á glæsihryssunni Frænku sem er undan Þristi frá feti. Til hamingju Stefán

Takk fyrir daginn ágætu félagar stjórn Brimfaxa þakkar fyrir sig.

kær kveðja herra Hilmar formaður.

10.04.2011 15:22

Til hamingju Dóri

Föstudaginn þann áttunda apríl fór fram forskoðun folalda bæði í Keflavík og Grindavík á vegum Mána. Það var Magnús Lárusson kynbótadómari sem skoðaði og dæmdi folöldin í hverju húsi fyrir sig og síðan komust 5 hæst dæmdu folöldin af hvoru kyni á sýninguna í Mánahöllinni. Það er skemmst frá því að segja að Teódór Vilbergsson skákaði öllum stórræktendum með sínu gullfallega folaldi Frosta sem er undan Mýdasi og Eik. Frosti endaði í þriðja sæti og verður það að teljast mjög gott. Það verður spennandi að fylgjast með þessu tryppi á komandi árum, og svo er það spurningin: ,,ætlar Dóri að halda honum gröðum?''

Til hamingju Dóri.

Kær kveðja Stjórn Brimfaxa.

05.03.2011 15:26

Sæþór og Brimfaxi vekja athygli


Á folaldasýningu í Sörlahöllinni Hafnarfirði vöktu grindvísku folöldin þeir Sæþór og Brimfaxi mikla athygli
fyrir glæsileika og kosti. Sæþór varð í öðru sæti og Brimfaxi í því þriðja. Það er engin spurning um það að þetta vekur mikkla eftirtekt og athygli og auglýsir okkar litla hestamannafélag gríðarlega um leið og ræktunarstarf þeirra hjóna í Stafholti, enda bæði hjónin merkt Brimfaxa í bak og fyrir.
Óskum við Brimfaxafélagar Palla og Mundu hjartanlega til hamingju með árangurinn og óskum þeim velfarnaðar í leik og starfi.
Kær kveðja stjórn Brimfaxa

05.03.2011 15:23

Styrmir lunkinn

Styrmir sendi folaldsmeri á sýninguna í Hafnarfirði með þeim Sæþór og Brimfaxa og vakti hún athygli fyrir góða byggingu. Þessi meri á örugglega eftir að vekja athygli í framtíðinni enda ákaflega vel ættuð. Óskum við Styrmi til hamingju og velfarnaðar á hinni grýttu braut sem hrossaræktunin er. Kær kveðja. stjórn Brimfaxa.

27.02.2011 15:31

Ótitlað

Það er ekki langt síðan Hemmi á Stað skellti sér út í hrossarækt og er ekki að sökum að spyrja með hann Hermann, hann sættir sig ekki við neina meðalmennsku í því sem hann tekur sér fyrir hendur. Ekki einungis að hann sé kominn með einn besta knapa landsins í vinnu heldur líka er hann farinn að klóra í bakið á helstu hrossaræktendum landsins. Það heyrist því oft sagt meðal ræktenda: ,,Hver er þessi rollukarl þarna úr Grindavík? Hann byrjar bara á toppnum." Við bíðum spennt eftir landsmótinu.

Kær kveðja frá Brimfaxafélögum.

27 jan 2011
Fjórgangur meistaradeild VÍS
10 sæti
Hestur: Ófelía frá Holtsmúla 1 (fædd 2005 einungis á 6 vetri)
Einkunn: 6,73
Knapi: Jakob Sigurðsson
Eigandi: Hermann Ólafsson ( Hemmi á Stað )

27.02.2011 15:30

Helgi frá Stafholti í 3. sæti



Föstudaginn 25. febrúar keppti Snorri Dal fyrir Sörla í keppni milli félaga á höfuðborgarsvæðinu á Helga frá Stafholti. Margir mjög sterkir hestar voru meðal keppenda og endaði Helgi í þriðja sæti með einkunina 7.0 sem verður að teljast mjög viðunnandi þar sem vitað er að hann á mikið inni ennþá. Þetta er enn eitt dæmið um góðan árangur í hrossarækt í Grindavík og má geta þess að áður hefur Styrmir náð langt með hana Stakkavík sem er undan henni Fold frá Grindavík. Og hvað skyldu svo Raggi og Stebbi gera í framtíðinni ?

05.09.2010 15:40

Helgi frá Stafholti í úrslitum á íslandsmóti


Gæðingurinn Helgi frá Stafholti sem er úr ræktun Palla Jóa og Mundu í Stafholti stóð sig vel á nýliðnu Íslandsmóti í hestaíþróttum. Helgi varð í 6 sæti í slaktaumatölti en hann var að keppa í þessari grein í fyrsta skipti. Hann var í 1-2 sæti eftir fyrstu tvær umferðirnar en datt svo neðar í síðustu umferðinni. Helgi var setin af Snorra Dal en knapinn sá bjó í Grindavík á yngri árum. Gaman verður að fylgjast með þeim í framtíðinni.

10.08.2010 15:42

isting frá Grindavík

Styrmir fékk þessa myndar hryssu nú í ágúst. Hryssan er undan gæðinginum Eldjárni frá Tjaldhólum og Fold frá Grindavík. Fold er 1. verðlauna Orradóttir og fékk hún 8,24 í aðaleinkunn á sínum tíma og þar af 8,55 fyrir hæfileika.

Fold er ein helsta ræktunarhryssan í Grindavík og er fyrsta hryssan frá Grindavík sem fór í 1. verðlaun. Dóttir Foldar, hún Stakkavík frá Feti fór í 8,31 í fyrra og var fulltrúi Íslands á heimsmeistaramótinu 2009.

05.07.2010 16:11

Sæþór frá Stafholti


Þessi ungi og glæsilegi kappi er úr ræktun þeirra Mundu og Palla Jóa í Stafholti. Þetta er mjög eftirtektarverður foli og er hann undan Hákoni frá Ragnheiðastöðum og Bendingu frá Kaldbak.

Í þessum fola eru gen úr gæðingum eins og m.a. Álfi frá Selfossi, Hátíð frá Úlfsstöðum og Gusti frá Grund. Garparnir Orri frá Þúfu og Kolfinnur frá Kjarnholtum koma einnig báðir tvisvar fyrir í ættartrénu hjá honum.

05.07.2010 16:10

Ótitlað


Stebbi Kristjáns fékk þessa flottu hryssu í sumar. Hryssan er sláandi lík föður sínum, honum Krák frá Blesastöðum en hann er að festa sig í sessi sem einn allra efnilegasti kynbótahesturinn hér á landi. Krákur á 3 afkvæmi dæmd og hafa þau öll farið í góð 1. verðlaun 4. vetra að aldri. Glæsileg byrjun.

Móðirin er 1. verðlaunahryssan Ör frá Síðu en hún er úr ræktun Viðars Jónssonar í Keflavík sem reynst hefur mörgum vel og er hún undan Ófeigssyninum Hrannari frá Kýrholti. Garpurinn Ófeigur frá Flugumýri kemur því fyrir báðum megin í þessari ungu hryssu.

05.07.2010 15:51

Skarði frá Flagveltu


Brimfaxafélagar eru duglegir í ræktuninni og hér er hann Skarði frá Flagveltu úr ræktun Péturs og Birtu. Þessi foli fer mjög fallega á öllum gangi og er undan Mjölni frá Hlemmiskeiði og Heru frá Bjalla.

Mjölnir er háttdæmdur Krákssonur og Hera er Óðsdóttir með 1. verðlaun fyrir hæfileika. Gaman er að því að Ófeig frá Flugumýri má finna á fjóra vegu í ættartré þessa hests. Ófeigur kemur tvisvar í gegnum dótturson sinn Óð frá Brún og síðan í gegnum son sinn Keili frá Miðsitju og dótturina Björk frá Götu

20.06.2010 16:40

Brimfaxi fæddur


Brimfaxi frá Stafholti er komin í heiminn. Á dögunum kom fyrsta folaldið í sumar úr ræktun þeirra Palla Jóa og Mundu í Staholti.
Um er að ræða leirljósan myndar hest sem var að sjálfsögðu skírður Brimfaxi. Folinn er undan gæðingunum Mídasi frá Kaldbak og Birtu frá Heiði. Brimfaxi á tvo eldri albræður þá Bjarma og Bjartmar sem hafa unnið sér það til frægðar að sigra folaldasýningarnar hjá hestamannafélaginu Mána sl. tvö ár.

Gaman væri ef hinn stæðilegi Brimfaxi skyldi halda áfram hefðinni sem bræður hans hafa skapað og sigra næstu folaldasýningu er haldin verður á Mánagrund

11.06.2010 15:47

Fornsögulegt nafn


Grímur Hrafnsson, er var yfirnemi á Vífilsstöðum, en meistarinn Jón Kjarvalarson, "sá gamli", var, eins og áður er sagt, orðinn hrumur af elli og kominn af fótum fram. Kolskeggur reið því ávalt á milli Vífilsstaða og Krýsavíkur. Hann hafði 12 gæðinga til reiðar, alla hvíta og báru allir faxanöfnin. Tveir hvítir hundar eltu hann jafnan. "Sá gamli" var brenndur inni á Vífilsstöðum, en "Kölski" slapp úr umsátri á Gömlu-Krýsuvík og komst á einn hesta sinna, Brimfaxa, mikinn gæðing.

Tekið af
www.ferlir.is

08.06.2010 16:15

Folöldin í Flagveltu


Nú eru fyrstu tvö fölöldin fædd í Flagveltu hjá Pétri og Birtu og á eitt folald á eftir að koma til viðbótar í sumar. Fyrst kom myndarleg rauðstjörnótt klárhryssa undan Krák frá Blesastöðum og Gusts frá Hóli dóttirinni Gjóstu frá Laufási. Tveim dögum síðar koma svo skrefamikil móálótt fimmgangshryssa undan Sæfara frá Hákoti og Hnátu frá Skarði, en Hnáta er undan Mána frá Ketilsstöðum.

Brimfaxamenn eru hvattir til að senda okkur myndir af fölöldum sínum í sumar og smá upplýsingum um þau og það er aldrei að vita nema að þau eigi eftir að keppa undir merkjum Brimfaxa þegar fram líða stundir

14.05.2010 16:19

Félagsnafnið Brimfaxi



Kosið var um nafn á hestamannafélagi Grindavíkur fimmtudaginn 6 maí sl. og var nokkuð góð mæting á fundinn. Kosningarnar voru skemmtilegar og spennandi og mjótt var á munum. Kosið var í þremur umferðum og vann nafið Brimfaxi á þegar leið á kvöldið. Mjög góð sátt virtist um niðurstöðuna og nafnið, en Brimfaxi er kraftmikið og rammíslenskt gæðingsnafn með góða tenginu við sjóinn og sjómennskuna sem er eitt helsta einkenni Grindavíkur. Til hamingju með nafnið Brimfaxafélagar.
Flettingar í dag: 68
Gestir í dag: 25
Flettingar í gær: 108
Gestir í gær: 28
Samtals flettingar: 646912
Samtals gestir: 79443
Tölur uppfærðar: 12.12.2017 07:55:26