05.03.2011 15:23

Styrmir lunkinn

Styrmir sendi folaldsmeri á sýninguna í Hafnarfirði með þeim Sæþór og Brimfaxa og vakti hún athygli fyrir góða byggingu. Þessi meri á örugglega eftir að vekja athygli í framtíðinni enda ákaflega vel ættuð. Óskum við Styrmi til hamingju og velfarnaðar á hinni grýttu braut sem hrossaræktunin er. Kær kveðja. stjórn Brimfaxa.

27.02.2011 15:31

Ótitlað

Það er ekki langt síðan Hemmi á Stað skellti sér út í hrossarækt og er ekki að sökum að spyrja með hann Hermann, hann sættir sig ekki við neina meðalmennsku í því sem hann tekur sér fyrir hendur. Ekki einungis að hann sé kominn með einn besta knapa landsins í vinnu heldur líka er hann farinn að klóra í bakið á helstu hrossaræktendum landsins. Það heyrist því oft sagt meðal ræktenda: ,,Hver er þessi rollukarl þarna úr Grindavík? Hann byrjar bara á toppnum." Við bíðum spennt eftir landsmótinu.

Kær kveðja frá Brimfaxafélögum.

27 jan 2011
Fjórgangur meistaradeild VÍS
10 sæti
Hestur: Ófelía frá Holtsmúla 1 (fædd 2005 einungis á 6 vetri)
Einkunn: 6,73
Knapi: Jakob Sigurðsson
Eigandi: Hermann Ólafsson ( Hemmi á Stað )

27.02.2011 15:30

Helgi frá Stafholti í 3. sæti



Föstudaginn 25. febrúar keppti Snorri Dal fyrir Sörla í keppni milli félaga á höfuðborgarsvæðinu á Helga frá Stafholti. Margir mjög sterkir hestar voru meðal keppenda og endaði Helgi í þriðja sæti með einkunina 7.0 sem verður að teljast mjög viðunnandi þar sem vitað er að hann á mikið inni ennþá. Þetta er enn eitt dæmið um góðan árangur í hrossarækt í Grindavík og má geta þess að áður hefur Styrmir náð langt með hana Stakkavík sem er undan henni Fold frá Grindavík. Og hvað skyldu svo Raggi og Stebbi gera í framtíðinni ?

05.09.2010 15:40

Helgi frá Stafholti í úrslitum á íslandsmóti


Gæðingurinn Helgi frá Stafholti sem er úr ræktun Palla Jóa og Mundu í Stafholti stóð sig vel á nýliðnu Íslandsmóti í hestaíþróttum. Helgi varð í 6 sæti í slaktaumatölti en hann var að keppa í þessari grein í fyrsta skipti. Hann var í 1-2 sæti eftir fyrstu tvær umferðirnar en datt svo neðar í síðustu umferðinni. Helgi var setin af Snorra Dal en knapinn sá bjó í Grindavík á yngri árum. Gaman verður að fylgjast með þeim í framtíðinni.

10.08.2010 15:42

isting frá Grindavík

Styrmir fékk þessa myndar hryssu nú í ágúst. Hryssan er undan gæðinginum Eldjárni frá Tjaldhólum og Fold frá Grindavík. Fold er 1. verðlauna Orradóttir og fékk hún 8,24 í aðaleinkunn á sínum tíma og þar af 8,55 fyrir hæfileika.

Fold er ein helsta ræktunarhryssan í Grindavík og er fyrsta hryssan frá Grindavík sem fór í 1. verðlaun. Dóttir Foldar, hún Stakkavík frá Feti fór í 8,31 í fyrra og var fulltrúi Íslands á heimsmeistaramótinu 2009.

05.07.2010 16:11

Sæþór frá Stafholti


Þessi ungi og glæsilegi kappi er úr ræktun þeirra Mundu og Palla Jóa í Stafholti. Þetta er mjög eftirtektarverður foli og er hann undan Hákoni frá Ragnheiðastöðum og Bendingu frá Kaldbak.

Í þessum fola eru gen úr gæðingum eins og m.a. Álfi frá Selfossi, Hátíð frá Úlfsstöðum og Gusti frá Grund. Garparnir Orri frá Þúfu og Kolfinnur frá Kjarnholtum koma einnig báðir tvisvar fyrir í ættartrénu hjá honum.

05.07.2010 16:10

Ótitlað


Stebbi Kristjáns fékk þessa flottu hryssu í sumar. Hryssan er sláandi lík föður sínum, honum Krák frá Blesastöðum en hann er að festa sig í sessi sem einn allra efnilegasti kynbótahesturinn hér á landi. Krákur á 3 afkvæmi dæmd og hafa þau öll farið í góð 1. verðlaun 4. vetra að aldri. Glæsileg byrjun.

Móðirin er 1. verðlaunahryssan Ör frá Síðu en hún er úr ræktun Viðars Jónssonar í Keflavík sem reynst hefur mörgum vel og er hún undan Ófeigssyninum Hrannari frá Kýrholti. Garpurinn Ófeigur frá Flugumýri kemur því fyrir báðum megin í þessari ungu hryssu.

05.07.2010 15:51

Skarði frá Flagveltu


Brimfaxafélagar eru duglegir í ræktuninni og hér er hann Skarði frá Flagveltu úr ræktun Péturs og Birtu. Þessi foli fer mjög fallega á öllum gangi og er undan Mjölni frá Hlemmiskeiði og Heru frá Bjalla.

Mjölnir er háttdæmdur Krákssonur og Hera er Óðsdóttir með 1. verðlaun fyrir hæfileika. Gaman er að því að Ófeig frá Flugumýri má finna á fjóra vegu í ættartré þessa hests. Ófeigur kemur tvisvar í gegnum dótturson sinn Óð frá Brún og síðan í gegnum son sinn Keili frá Miðsitju og dótturina Björk frá Götu

20.06.2010 16:40

Brimfaxi fæddur


Brimfaxi frá Stafholti er komin í heiminn. Á dögunum kom fyrsta folaldið í sumar úr ræktun þeirra Palla Jóa og Mundu í Staholti.
Um er að ræða leirljósan myndar hest sem var að sjálfsögðu skírður Brimfaxi. Folinn er undan gæðingunum Mídasi frá Kaldbak og Birtu frá Heiði. Brimfaxi á tvo eldri albræður þá Bjarma og Bjartmar sem hafa unnið sér það til frægðar að sigra folaldasýningarnar hjá hestamannafélaginu Mána sl. tvö ár.

Gaman væri ef hinn stæðilegi Brimfaxi skyldi halda áfram hefðinni sem bræður hans hafa skapað og sigra næstu folaldasýningu er haldin verður á Mánagrund

11.06.2010 15:47

Fornsögulegt nafn


Grímur Hrafnsson, er var yfirnemi á Vífilsstöðum, en meistarinn Jón Kjarvalarson, "sá gamli", var, eins og áður er sagt, orðinn hrumur af elli og kominn af fótum fram. Kolskeggur reið því ávalt á milli Vífilsstaða og Krýsavíkur. Hann hafði 12 gæðinga til reiðar, alla hvíta og báru allir faxanöfnin. Tveir hvítir hundar eltu hann jafnan. "Sá gamli" var brenndur inni á Vífilsstöðum, en "Kölski" slapp úr umsátri á Gömlu-Krýsuvík og komst á einn hesta sinna, Brimfaxa, mikinn gæðing.

Tekið af
www.ferlir.is

08.06.2010 16:15

Folöldin í Flagveltu


Nú eru fyrstu tvö fölöldin fædd í Flagveltu hjá Pétri og Birtu og á eitt folald á eftir að koma til viðbótar í sumar. Fyrst kom myndarleg rauðstjörnótt klárhryssa undan Krák frá Blesastöðum og Gusts frá Hóli dóttirinni Gjóstu frá Laufási. Tveim dögum síðar koma svo skrefamikil móálótt fimmgangshryssa undan Sæfara frá Hákoti og Hnátu frá Skarði, en Hnáta er undan Mána frá Ketilsstöðum.

Brimfaxamenn eru hvattir til að senda okkur myndir af fölöldum sínum í sumar og smá upplýsingum um þau og það er aldrei að vita nema að þau eigi eftir að keppa undir merkjum Brimfaxa þegar fram líða stundir

14.05.2010 16:19

Félagsnafnið Brimfaxi



Kosið var um nafn á hestamannafélagi Grindavíkur fimmtudaginn 6 maí sl. og var nokkuð góð mæting á fundinn. Kosningarnar voru skemmtilegar og spennandi og mjótt var á munum. Kosið var í þremur umferðum og vann nafið Brimfaxi á þegar leið á kvöldið. Mjög góð sátt virtist um niðurstöðuna og nafnið, en Brimfaxi er kraftmikið og rammíslenskt gæðingsnafn með góða tenginu við sjóinn og sjómennskuna sem er eitt helsta einkenni Grindavíkur. Til hamingju með nafnið Brimfaxafélagar.

06.04.2010 09:00

Grindvískur gæðingur á ístöli þeirra allra sterkustu

Grindvíski gæðingurinn Helgi frá Stafholti úr ræktun þeirra Palla Jóa og Mundu í Stafholti stóð sig afar vel á ístöltmóti þeirra allra sterkustu um helgina og endaði í 6-8 sæti. Mótið er gríðar sterkt og er einn af hápunktunum í hestaíþróttum á íslandi ár hvert. Helgi frá Stafholti er fyrrum stóðhestur og er undan heiðursverðlaunahestinum Keili frá Miðsitju og gæðinginum Heklu frá Halldórsstöðum. Helgi var sýndur af Snorra Dal.



29.03.2010 10:21

Góð mæting á stofnfund

Hestamannafélag Grindavíkur var stofnað þann 25. mars s.l. og var góð mæting á stofnfund félagsins í Salthúsinu. Mjög létt var yfir fundargestum og ánægja með að sjálfstætt hestamannafélag í Grindavík væri orðið að veruleika. Mjög góð skráning var á stofnfélögum í félagið og verður tekið á móti skráningum sem stofnfélögum í félagið fram á þriðjudagskvöldið þann 30. mars n.k. Skráningar gefa til kynna að stofnfélagar verði tæplega sjötíu talsins.

Á fundinum var ákveðið að efna til samkeppni um nafn að félaginu og félagsmenn mun síðan kjósa um nafn á félaginu í byrjun maí. Einnig var ákveðið árgjald félagsins.

Fyrstu stjórn hestamannafélags Grindavíkur skipa:
Pétur Bragason formaður
Ragnar Eðvarðsson meðstjórnandi
Eyjólfur Magnússon gjaldkeri

Varamenn í stjórn:
Hilmar Knútsson
Birta Ólafsdóttir
Jón Ásgeir Helgason


23.03.2010 16:33

Stofnfundur

23. mars 2010
Stofnfundur hestamannafélags

Hestamenn í Grindavík eru hvattir til þess að mæta á stofnfund hestamannafélags í Grindavík sem haldinn verður í Salthúsinu kl. 19:30 fimmtudaginn 25. mars n.k.

Dagskrá:
1. Lög/Samþykktir félagsins
2. Skráning stofnfélaga
3. Ákvörðun um árgjald
4. Kosning stjórnar

Hestakveðja,

Pétur Bragason
Ragnar Eðvarðsson
Hilmar Knútsson
Jón Ásgeir Helgason
Birta Ólafsdóttir


Flettingar í dag: 229
Gestir í dag: 39
Flettingar í gær: 933
Gestir í gær: 45
Samtals flettingar: 813116
Samtals gestir: 93521
Tölur uppfærðar: 23.9.2018 18:44:01