27.04.2014 20:01

Aðsend tilkynning.

Hestamannafélagið Hörður og FT-Suður bjóða til sýnikennslu.
 
FT-Suður og hestamannafélagið Hörður standa fyrir skemmtilegri og léttri sýnikennslu á miðvikudaginn 30. apríl næstkomandi í reiðhöll Harðar í Mosfellsbæ. Félagið langar að bjóða öllum börnum og unglingum í æskulýðsdeildum hestamannafélaga á sýnunguna. Þrír útskrifaðir reiðkennarar frá Háskólanum á Hólum munu sýna leiðina að mýkt og léttleika, þær Christina Mai, Sina Scholz og Sjöfn Sæmundsdóttir.
Frábært tækifæri fyrir yngri kynslóðina að eiga góða stund saman!:)
Sýnikennslan hefst klukkan 19.30 og verður kaffisala á staðnum.

Kær kveðja, FT-Suður

22.04.2014 23:40

Sumardagurinn fyrsti 24. apríl

Sæl öllsömul.
Þá er komið að því að vígja nýja reiðveginn sem liggur með nesveginum og við erum nýbúin að láta mala hann fyrir okkur.
Við ætlum að taka daginn snemma og vera lögð af stað klukkan 10:00 árdegis. Það verður lagt af stað frá hesthúsahverfinu á slaginu 10:00 og er mikilvægt að sú tímasetning standist. Víkurmenn eru beðnir um að ríða á móti okkur og mæta okkur við Þorbjörn. Svo ríðum við saman í fylkingu og klippum á borða og vígjum reiðleiðina. Stóra spurningin er þessi, ætli Víkurmenn bjóði uppá kaffi já og kannski eitthvað með því.? ja þegar stórt er spurt  svarar Guðjón útí hött!.
Sjáumst vonandi hress og kát.
Kv. Formaðurinn.

13.04.2014 23:31

Páskabingó

Páskabingó æskulýðsdeildarinnar verður þriðjudaginn 15. apríl kl. 17:00 í Stakkavík.

09.04.2014 22:49

Opið íþróttamót Mána 25.-27.apríl nk

Hestamannafélagið Máni heldur Opið íþróttamót Mána sem fer fram helgina 25.-27. apríl nk.

Máni hefur undanfarin ár haldið Opið íþróttamót í lok apríl. Mótið hefur verið vel sótt þar sem þetta er fyrsta opna íþróttamót keppnistímabilsins á Suðvesturhorninu.

Boðið verður uppá eftirfarandi greinar:

Meistaraflokkur: Fjórgangur V1-Tölt T1-Tölt T4-Fimmgangur F1 -Gæðingaskeið

1.flokkur: Fjórgangur V2-Tölt T3-Tölt T4-Tölt T7-Fimmgangur F2-Gæðingaskeið-100m skeið

2.flokkur: Fjórgangur V2-Tölt T3-Tölt T4-Tölt T7-Fimmgangur F2-Gæðingaskeið

Ungmennaflokkur: Fjórgangur V2-Tölt T3-Tölt T4-Fimmgangur F2-Gæðingaskeið

Unglingaflokkur: Fjórgangur V2-Tölt T3-Tölt T4-Fimmgangur F2-Gæðingaskeið

Barnaflokkur: Fjórgangur V2-Tölt T3

Pollaflokkar: Ríðandi og teymdir (þátttökuverðlaun, ekki raðað í sæti)

ATH að T4 er skráð sem T2 í skráningarkerfinu

Skráning er hafin á eftirfarandi vefslóð: http://skraning.sportfengur.com/Skraningkort.aspx?mode=add

Skráningu lýkur á miðnætti mánudaginn 21.apríl.

Passa þarf að velja skráningu í efstu línu - svo mót í næstu línu - velja  Mána sem mótshaldara og fylla svo inní stjörnumerkta reiti. Neðst er hægt að velja um atburð og þá er valið Opið íþróttamót. Þá birtast, fyrir neðan, þær greinar sem í boði eru á mótinu. Keppandi velur sér grein og uppá hvora hönd skal riðið. Þegar keppandi hefur valið það sem við á og fyllt út alla stjörnumerkta reiti er pöntunin sett í körfu sem er hnappur neðst á síðunni. Hægt er að bæta við fleiri skráningum og setja í körfuna. Þegar keppandi er búinn að skrá þá er farið í vörukörfuna efst í hægra horninu og gengið frá greiðslu þar, hægt er að velja um kortagreiðslu eða millifærslu.

Ath að ef greitt er með millifærslu þá verður að setja pöntunarnúmer sem tilvísun og senda póst á: hmfmani@gmail.com

Kvittun mun berast á skráð netfang - passið að fara vel yfir netföng svo þau séu rétt.

Ef greiðsla hefur ekki borist þá er keppandi ekki skráður á mótið.

Ef eitthvað er óljóst má senda fyrirspurn í pósti á hmfmani@gmail.com

Skráningargjald er 4000kr á grein og 1000kr í pollaflokkana (skráning á staðnum).

Vakin er athygli á því að 1. flokkur er ætlaður keppnisvönum knöpum og 2.flokkur minna keppnisvönum.

Mótanefnd áskilur sér rétt til að sameina og/eða fella niður greinar og flokka ef ekki næst nægileg þátttaka.

Með von um að sjá sem flesta.

Mótanefnd Mána

07.04.2014 12:21

Fræðsluferð Reiðveganefndar

Frétt af sprettarar.is:

Fræðsluferð Reiðveganefndar í Kjalarnesþingi hinu forna.
Á fundi Reiðveganefndar í Kjalarnesþingi hinu forna þann 20. mars sl.var ákveðið að efna til fræðsluferðar í umdæmi nefndarinnar. Var þeim Ara Sigurðssyni Sóta og Jóhannesi Oddssyni Herði falið að annast undirbúning ferðarinnar. 4. apríl varð fyrir valinu, var miðað við að allt að fimm manns mættu frá hverju félagi.

Fyrir þau sem ekki vita hvað ,,Reiðveganefnd í Kjalarnesþingi hinu forna" er þá er það samstarfsnefnd hestamannafélaga á SV svæði landsins. Hestamannafélögin í umdæmi nefndarinnar eru átta, Adam í Kjós, Hörður í Mosfellsbæ, Fákur í Reykjavík, Sprettur í Kópavogi og Garðabæ, Sóti á Álftanesi, Sörli í Hafnarfirði, Brimfaxi í Grindavík og Máni í Reykjanesbæ og Reykjanesi. Baráttumál nefndarinnar er að byggja upp og viðhalda reiðvegum í umdæminu til hagsbóta fyrir hinn almenna hestamann, þeir koma nefnilega ekki til bara svona af sjálfu sér.

Sjá alla fréttina ásamt myndum hér: http://www.sprettarar.is/frettir/315-fraedhsluferdh-reidhveganefndar

04.04.2014 14:24

Kynjakettir í Brimfaxahöllinni

Kynjakettir verða með alþjóðlega vorsýningu í Brimfaxahöllinni 5. og 6. apríl 2014.
 
Frétt um sýninguna má sjá hér: http://grindavik.is/v/13122
 
Kvennadeild Brimfaxa verður með kaffisölu og allir eru hvattir til að koma.
 
Miðaverð á sýninguna má sjá hér: http://kynjakettir.is/
 
Opið verður frá 10:00 - 16:00 báða dagana.

29.03.2014 20:18

Vinna í dag

Nokkrar myndir sem Jóhanna Harðardóttir tók í dag í reiðhöllinni eru komnar í myndaalbúmið.

28.03.2014 21:08

Reiðhallarvinna


Kæru félagar.
Það væri gaman að sjá sem flesta nú um helgina við vinnu í höllinni okkar.
Það geta allir gert eitthvað og okkur veitir ekki af enda stórviðburður um næstu helgi og þá þurfum við að vera búin að taka til hendinni.
Stöndum saman og sýnum samtakamátt.
Við byrjum kl. 8.00 laugardag og sunnudag.
Sjáumst.
Formaðurinn

07.03.2014 21:34

FEIF Youth Cup - opið fyrir umsóknir

Æskulýðsnefnd LH auglýsir eftir umsóknum á FEIF Youth Cup sem haldið verður dagana 11. - 20. júlí 2014 að Hólum í Hjaltadal. Heimasíðan www.lhhestar.is/is/youth-cup-2014  er upplýsingasíða mótsins.

Skilyrði fyrir þátttöku eru:

  • Reynsla í hestamennsku
  • Keppnisreynsla í íþróttakeppni
  • Góð enskukunnátta
  • Sjálfstæði og jákvæðni
  • Að geta unnið í hóp
  • Reglusemi

Á vef FEIF Youth Cup er að finna umsóknareyðublað sem fylla þarf út og senda til skrifstofu LH. Einnig þarf bréf frá umsækjanda að fylgja, þar sem hann segir frá sjálfum sér, áhugamálum, hestamennsu og því sem hann vill koma á framfæri.

Nánari upplýsingar fást á heimasíðu FEIF Youth Cup, skrifstofu LH og hjá æskulýðsfulltrúum LH og hestamannafélaganna.

Umsóknir þurfa að hafa borist skrifstofu LH, Engjavegi 6, 104 Reykjavík fyrir 1. apríl 2014. Senda má umsóknir á ofangreint póstfang í bréfpósti eða í tölvupósti á netfangið hilda@landsmot.is.

Æskulýðsnefnd Landssambands hestamannafélaga.

04.03.2014 22:08

Fákasel

Æskulýðsnefnd Brimfaxa stóð fyrir fjölskylduferð í Fákasel að sjá leiksýninguna Legends of Sleipnir.
Fyrir sýningu var kíkt bakvið tjöldin, þar sem við fengum fræðslu um starfsemina hjá Fákaseli og auðvitað var kíkt á hestana sem eru aðalstjörnurnar, eftir frábæra kynningu fengum við okkur öll saman að borða á veitingastaðnum. Leiksýningin var í alla staði frábær og var ekki annað að sjá en að allir hafi skemmt sér mjög vel ungir sem aldnir :)
Við viljum þakka þeim í Fákaseli kærlega fyrir okkur.
Fullt af myndum frá ferðinni sem Jóhanna Harðard. tók eru komnar í myndaalbúmið.

Æskulýðsdeild Brimfaxa.

03.03.2014 21:36

Fundur 5 mars

Sælir félagar
Nú á miðvikudaginn 5. mars kl.19.00 ætlum við að hittast í Stakkavík og fara yfir málefni reiðhallarinnar,
einnig ætlum við að ræða ferðina í Ölfushöllina á töltið sem við köllum í dagskránni menningarauka.
Við hvetjum alla til að mæta og leggja sitt af mörkum í umræðunni.
Kær kveðja.
Herra Hilmar formaður.

02.03.2014 20:59

Nasamúll fannst

Nasamúll fannst á veginum sem liggur að hesthúsunum, um er að ræða nýjan múl með gylltri rönd. Múllinn er í vörslu formannsins, eigandinn getur haft samband í síma 898-5696 Hilmar.

27.02.2014 17:15

Hestaleikhúsið 28 feb.

Við ætlum að hittast í Fákaseli í Ölfusi kl. 17:00 á morgun.
 
Við fengum tilboð í matinn en þeir sem ætla að borða á veitingastaðnum, vinsamlegast látið vita í kvöld eða strax á morgun í síma 848-0143 eða á netfangið brimfaxi@gmail.com svo að vitað er um fjöldann í mat.
 
Tilboðið er svohljóðandi:
 
Barnahamborgari 990 kr.
Ostborgari 1790 kr.
Fákaborgari 2090 kr.
 
Með öllum hamborgurum fylgja franskar.
 
Kveðja, æskulýðsnefnd.

25.02.2014 22:18

Ending frá Stafholti

Ragnar Eðvaldsson sýndi Endingu frá Stafholti fyrir ræktendur/eigendur hennar. Hér má sjá Ragnar og Endingu við verðlaunaafhendinguna.

22.02.2014 20:31

Úrslit folaldasýningar

Úrslit frá folaldasýningu Mána og Brimfaxa má finna á heimasíðu Mána.
 
Merfolaldið Ending frá Stafholti sem er í eigu Palla Jóa og Mundu varð í 1 sæti í merarflokki.
 
Öll önnur úrslit má sjá hér: www.mani.is
Flettingar í dag: 68
Gestir í dag: 25
Flettingar í gær: 108
Gestir í gær: 28
Samtals flettingar: 646912
Samtals gestir: 79443
Tölur uppfærðar: 12.12.2017 07:55:26